- Mediante o convenio coa Xunta, a SGR do sur de Galicia inxectou financiamento a 343 empresas, por un importe de 51,7 millóns de euros e cun investimento xerado de 61 millóns
- Esas operacións permitiron consolidar 4.340 empregos en Galicia durante o ano pasado, tres veces máis que en 2023
- A vixencia xa desde xaneiro do convenio da Xunta permitiu a Sogarpo triplicar o importe dos avais outorgados con produto público autonómico e tamén o investimento conseguido
- O risco en vigor asumido a través dos convenios anuais co Igape elévase a 86,4 millóns, dentro dunha carteira global da SGR galega que pon rumbo aos 200 millóns de euros

A colaboración público-privada entre Sogarpo e Igape tivo como resultado en 2024 un novo incremento de actividade para a SGR e un maior acceso a financiamento con produto público autonómico para as pemes galegas. E ademais nun exercicio que se caracterizou no sector pola combinación dunha caída de produtividade atribuída ao aumento dos custos laborais e de altos tipos de interese (antes da desescalada iniciada en xuño).

Neste contexto, Sogarpo outorgou o ano pasado 462 avais a 343 empresas a través das liñas Igape, por un importe conxunto de 51,7 millóns de euros e cun investimento xerado de 61 millóns. Na comparativa con 2023, estas cifras representan máis do dobre de avais concedidos e de empresas cubertas por Sogarpo con produto de financiamento da Xunta e máis do triplo en importe dos avais, en investimento inducido e en emprego protexido (4.340 postos de traballo consolidados en 2024 e 1.418 en 2023).

FINANCIAMENTO MAIS ACCESIBLE

A vixencia xa desde o mes de xaneiro de 2024 do convenio anual do Igape xustifica os incrementos do exercicio con liñas autonómicas de financiamento e a maior accesibilidade para pemes e autónomos. Artur Yuste, presidente de Sogarpo, resalta que “en 2024 houbo un máis que notable fortalecemento do financiamento de proxectos de empresa en Galicia e da cobertura das garantías que vén demandando o sector empresarial, é dicir, da mellor vía para o lanzamento e crecemento de empresas”.

As Liñas Igape canalizaron no pasado exercicio algo máis da metade -o 52%- de toda a operativa de Sogarpo por número de avais e de empresas. O peso do produto público da Xunta faise aínda máis visible no importe avalado e no investimento inducido, xa que en ambos os casos representa máis do 70% das magnitudes totais logradas pola SGR en 2024, sumando todas as liñas de financiamento públicas e privadas.

Dentro da carteira de risco en vigor (avais con vixencia a día de hoxe) da entidade, que se aproxima xa aos 200 millóns de euros, as operacións do Igape elévanse a 86,4 millóns por importe e a 119,5 millóns por investimento inducido. Desta forma, nun ano (comparativa con 2023) creceron un 71% e un 42%, respectivamente.