Ourense, 7 de xullo
Sogarpo e Deputación de Ourense renovaron o convenio marco que une as súas forzas desde 2023 e que en pouco máis de dous anos xa inxectou 14,2 millóns de euros a pemes e autónomos da provincia mediante unha liña de produto bonificado (avais con custo cero). Desde a súa activación levan beneficiado 166 empresas e profesionais ourensáns, que ao conseguir financiamento para os seus proxectos de investimento ou circulante consolidaron un total de 1.037 postos de traballo na provincia. O investimento inducido polos case 200 avais outorgados elevábase ao peche do primeiro semestre de 2025 a 16,65 millóns de euros.

Só na primeira metade de 2025, o importe avalado ascende a 3,23 millóns e o investimento inducido a 3,87 millóns. Estas cantidades representan o 69% e o 74,4% do importe avalado e do investimento inxectado en todo o exercicio de 2024.

A renovación do convenio hoxe na sede da institución ourensá contou coa participación do presidente de Sogarpo, Artur Yuste, e do presidente da Deputación Provincial de Ourense, #Luis Menor. No acto de firma, Artur Yuste destacou que grazas a este acordo “os empresarios e os autónomos da provincia de Ourense engaden estímulos para ampliar o horizonte dos seus proxectos, ao contar cun produto financeiro bonificado e moi competitivo”. Ademais, engadiu que mediante esta cooperación ambas as entidades “suman esforzos para diluír da paisaxe ourensá a desigualdade de oportunidades. O interior de Galicia e as zonas rurais -razoou Yuste- son tan lexítimas para emprender e poñer en marcha grandes ideas de negocio como o son as cidades ou as grandes áreas metropolitanas”.

O presidente de Sogarpo definiu o convenio renovado esta mañá como “un claro exemplo dos retornos que pode xerar a colaboración público-privada no ámbito do financiamento empresarial”. Precisou que esta liña provincial de avais bonificados xa leva achegado “estabilidade laboral a máis de mil traballadores e ás súas familias” e que, froito da sinerxia entre a SGR e a Deputación, a economía ourensá ha recibido un fluxo de 16,7 millóns de euros, que é “o investimento empresarial derivado dos 14,2 millóns do importe avalado en tan só os dous anos e tres meses que levamos de singradura conxunta” coa Deputación ourensá.

A gran vantaxe deste produto especializado é que o aval ten CUSTO CERO para os beneficiarios, polo que se converte nun produto financeiro moi competitivo en calquera escenario. Outra característica destacada é a amplitude da pinza do importe que se pode avalar: desde 3.000 ata 600.000 euros. Con este abanico, adáptase ás necesidades máis cotiás das microempresas e dos profesionais, pero tamén aos plans de expansión máis ambiciosos das pemes que están en pleno crecemento ou que basean o seu modelo no investimento.

Artur Yuste finalizou a súa intervención no acto de firma trasladando a mensaxe de que o verdadeiro resultado da sinerxia entre unha entidade privada e unha institución pública é que “ambos poñemos os nosos medios ao dispor dos empresarios e profesionais da provincia para que o financiamento empresarial non quede nun desexo, ou nunha simple petición, senón nunha aspiración cuberta e alcanzable con todas as garantías”.