Sogarpo pechou 2025 cun novo fito na súa traxectoria: superar por primeira vez os 70 millóns de euros en importe avalado a empresas e profesionais de Galicia. Con 827 formalizacións, a SGR galega inxectou 70,8 millóns na economía galega, xerou un investimento inducido de 89,05 millóns e consolidou 8.679 empregos en 663 empresas.

"O mellor resultado do exercicio foi consolidar os fortes crecementos dos que partiamos e facelo ademais nun escenario de inestabilidade comercial para moitos sectores", destacou Artur Yuste, presidente de Sogarpo.

Unha década de crecemento acelerado

Os datos de 2025 cobran especial relevancia en perspectiva: en só catro anos, Sogarpo duplicou o importe avalado, pasando dos 33,8 millóns de 2021 aos 70,8 millóns actuais, un incremento do 109,4%. Nese mesmo período, o investimento inducido tamén se dobrou (+113,5%) e o risco vivo —avais en vigor— creceu un 40,6%, situándose a peche de 2025 en 217,9 millóns de euros, un 13% máis que o ano anterior.

O investimento empresarial, protagonista

Un dos datos máis relevantes do exercicio é o cambio de tendencia no destino dos avais. Por primeira vez desde o inicio da década, o investimento volve superar ao circulante: o 55,4% dos avais concedidos en 2025 destináronse a financiar proxectos de investimento empresarial, tres puntos máis que en 2024, fronte ao 49,2% dirixido a necesidades de tesourería.

O papel clave do IGAPE

As liñas de financiamento do IGAPE captaron 54,6 millóns, cun crecemento do 5,7% en importe e do 9,5% en número de avais respecto a 2024. Este impulso do produto público da Xunta de Galicia propiciou un investimento inducido de 63,1 millóns e blindou 5.300 empregos en 406 empresas. A cooperación continuada entre o IGAPE e as SGR segue sendo un elemento esencial para facilitar o acceso a financiamento de pemes e autónomos en todo o territorio galego.

Convenio coa Deputación de Ourense

A liña de colaboración entre Sogarpo e a Deputación de Ourense, activa desde 2023, acumula xa 189 avais concedidos por un importe conxunto de 14,5 millóns de euros, un investimento inducido de 17,05 millóns e a consolidación de 1.077 empregos en 171 empresas da provincia.