• Os conselleiros analizaron os destacados crecementos a dobre díxito que está a lograr a SGR galega en financiamento empresarial desde o inicio do exercicio.
• Sogarpo creceu ata agosto un 61,5% en número de formalizacións de avais e un 13,1% en risco vivo.
• A fortaleza das Liñas Igape 2024 e o convenio coa Deputación de Ourense protagonizan o auxe de actividade da sociedade.
• A reunión no marco do Pescanova Biomarine Center do Grove dá continuidade aos consellos itinerantes de Sogarpo, tras os celebrados en Coren, Grupo Cuevas e Deputación de Ourense.

O primeiro consello de administración de Sogarpo tras o período estival ha elixido como marco as instalacións do Pescanova Biomarine Center do Grove, dando así continuidade aos consellos itinerantes que veñen celebrando na sede de compañías e entidades asociadas. Nesta reunión transcendeu un novo auxe de actividade da SGR galega na súa misión de facilitar o acceso ao crédito ás empresas e de mellorar as condicións de financiamento de cada socio.

Así, o número de formalizacións de avais creceu un 61,5% con respecto a agosto do ano anterior, mentres que o risco vivo da sociedade rexistrou un incremento do 13,1%. Tal e como analizaron os conselleiros, en ambas as porcentaxes tiveron peso e protagonismo tanto as Liñas Igape 2024 (en empresas das provincias de Pontevedra e Ourense) como o convenio coa Deputación de Ourense (en empresas con sede nesta provincia).        

Nesta ocasión, a reunión do consello de administración de Sogarpo trasladouse ao Pescanova Biomarine Center do Grove por invitación dos membros do consello representantes de Abanca. Tras a reunión, os conselleiros fixeron un percorrido polas instalacións do primeiro centro privado de investigación en acuicultura aberto en España, con máis de 4.000 metros cadrados dedicados á mellora da saúde, nutrición, benestar animal, sustentabilidade e a novas especies de cultivo. A visita finalizou cun cóctel na planta.          

A proximidade co sector empresarial, a accesibilidade, a confianza e o compromiso co financiamento empresarial adaptado a cada escenario económico están detrás da iniciativa de Sogarpo consistente en trasladar as reunións estratéxicas e de planificación ao corazón das empresas e das institucións. Nos últimos meses, a cooperativa Coren, o grupo Cuevas e a Deputación de Ourense albergaron consellos de administración da SGR galega.